Сафина Садуллаева ҳозирги жисмоний ҳолати ва олдинда кутиб турган мусобақалар ҳақида гапирди

У тез орада бўлиб ўтадиган ёпиқ иншоотлардаги Жаҳон чемпионатида иштирок этишни режалаштирмоқда. МОҚ матбуот хизмати спортчи билан кичик суҳбатни эълон қилди.

— Қишки мавсум Сиз учун қандай ўтмоқда?

"Қисқа дам олишдан кейин халқаро ўқув-машғулот йиғинларига йўл олдим. Машғулотларимни 19 февралгача Эстонияда олиб бораман. Бу орада Европанинг қатор мамлакатларида ташкил этиладиган халқаро мусобақаларда ҳам иштирок этишни режа қилганман".

— 2025 йил учун ўз олдингизга қандай мақсад қўйгансиз? 

"Аввало, ёзда ўтадиган Жаҳон чемпионатида муносиб иштирок этиш. Бунинг учун мусобақа нормативини (1.97 метр) бажаришим керак. Шунингдек, ёпиқ иншоотлардаги қитъа ва дунё биринчиликлари ҳам эътиборим марказидаги асосий мусобақалардан ҳисобланади".

— Сиз қатнашадиган энг яқин мусобақа қайси?

"29 январь куни Германияда халқаро турнир бўлиб ўтади. Дастлаб шу мусобақада қатнашаман. Ундан сўнг яна Эстонияда тайёргарликни давом эттирамам. Кейин ҳолатимга қараб яна бир қанча стартларда ўз омадимни синаб кўраман", деди Сафина Садуллаева.