Саралашдан чиққан Калинская дунёнинг биринчи ракеткасини мағлуб этди

Ярим финал учрашувида кутилмаган натижа қайд этилди. Сайёрамизнинг биринчи ракеткаси, польшалик Ига Свёнтек WTA рейтингида 40-поғонада бораётган россиялик Анна Калинскаяга 4/6, 4/6 ҳисобида ютқазиб, мусобақадаги иштирокини тўхтатди. Бу теннис маликаларининг ўзаро ўтказган илк учрашуви сифатида тарихга кирди. 

Бир соату 42 дақиқалик баҳсда Калинская 1, Свёнтек 5 та эйс зарбасини ижро этган. 25 ёшли Анна фаолиятида илк бор WTA турнири финалига чиқди. У бу муваффақияти эвазига душанба куни эълон қилинадиган рейтингда 16 поғонага юқорилаб, Топ-25`да дебют қилади.

Эътиборлиси, Калинская Дубай турниридаги иштирокини квалификация, яъни саралаш баҳсларидан бошлаган эди. Анна Дубай кортларида Топ-3 рейтингидан ўрин олган икки рақибасини таслим эта олди. Бундай натижага 1998 йилда Амели Моресмо эришганди.