Сауль "Канело" Альварес қачон аниқ кетишини айтди

Альварес 37 ёшга тўлиши билан фаолиятини якунламоқчи. У фаолиятининг қолган икки йилини Саудия Арабистони кўнгилочар Бош бошқармаси раҳбари, Riyadh Season ҳамда The Ring эгаси Турки Ал аш-Шейх билан ҳамкорликда ўтказади. 

"Турки Ал аш-Шейх — мен айнан шу инсон билан ҳамкорликда ишлаб, фаолиятимни якунлайман. Ҳозир менинг организмим жойида ва мен яна бир неча йил жанг қила оламан. 37 ёш — айнан мен боксдан кетишни мақсад қилган ёш. Бокс мени кетишга мажбур қилмасидан бу ишни ўзим амалга оширганим яхши. Фаолиятимни пул учун мажбуран давом эттирмайман. Ваъда бераман, 37 ёшдан кейин жанг қилмайман", — дея No Golf No Life гольф турнирига бағишланган матбуот анжуманида гапирган Альварес.  

Маълумот учун, 2027 йилнинг июлида Сауль Альварес 37 ёшга тўлади. У проф боксда 67 та жанг ўтказиб улгурди. Канело 4 та вазн тоифасида жаҳон чемпиони ҳисобланади. Ўзининг биринчи чемпионлик камарини 2011 йилда қўлга киритган. Бугунгача биринчи ўрта, ўрта, иккинчи ўрта ҳамда яримоғир вазн тоифаларида 26 та чемпионлик жангларида рингга кўтарилди.