Себастьян Леб "Чемпионлар пойгаси 2022" ғолиби

Ушбу пойга илк бор 1988 йилда Хенри Тойвонен хотирасига бағишлаб ўтказилганди. Пойгани ўтказишдан асосий мақсад - барча йўналишдаги пойга серияси вакилларининг энг зўрини аниқлаш. 

Бу йилги турнир Швециянинг Пите Хавсбад шаҳарчасидаги Болтиқ денгизининг музлаган ҳудудида ўтказилди. 

Пойгада Германия (Себастьян Феттель, Мик Шумахер), Нордики - Дания ва Швеция - (Йохан Кристофферссон, Том Кристенсен) Буюк Британия (Дэвид Култхард, Жейми Чедвик), Лотин Америкаси (Бенито Герра, Элио Кастроневес), Норвегия (Петтер ва Оливер Сольберги), АҚШ (Жимми Жонсон, Колтон Херта), Финляндия (Мика Хаккинен, Эмма Кимилайнен), Франция (Себастьен Леб, Дидье Ориоль), Швеция (Маттиас Экстрем, Тимми Хэнсен) жамоалари иштирок этди.

Финалга ралли ҳамда "Формула 1" юлдузлари - Себастьян Леб ва Себастьян Феттель етиб келишди. Леб финалгача Петтер ва Оливер Сольберг, ярим финалда Маттиас Экстремдан устун келди. Феттель эса 1/8 финалда Эмм Кимилайнен (Кимилайнен турнир арафасида Валттери Боттаснинг ўрнини эгаллаган), 1/4 финалда Колтон Херт, 1/2 финалда Том Кристенсенни ортда қолдирди.

Ҳал қилувчи финал best-of-5 форматида ўтказилди. Унда ралли пойгаларида 9 карра жаҳон чемпиони Себастьян Леб 4 карра "Формула 1" чемпиони Себастьян Феттелни 3:1 ҳисобида мағлуб этиб, "Чемпионлар пойгаси 2022" ғолибига айланди.

Ушбу ғалаба Леб учун "Чемпионлар пойгаси" турниридаги тўртинчиси бўлди. Бу борада франциялик пойгачи ватандоши Дидье Ориолага етиб олди. Уларнинг ҳар иккиси кечаги пойгада Франция шарафини ҳимоя қилдилар.