Сергей Фоминнинг Анталиядаги юриши давом этмоқда

Мукофот жамғармаси 15 000 долларни ташкил этувчи ушбу мусобақада ҳамюртимиз Сергей Фомин ҳам муваффақиятли одимлаяпти. Мамлакатимизнинг иккинчи ракеткаси дастлабки икки босқичда рақибларини мағлубиятга учратишни уддалади ва 1/4 финалга йўл олди. 

Теннисчимиз 1/16 финалда россиялик Бекхан Атлангериевни 6/4, 6/2, 1/8 финалда эса туркиялик Мерт Туркерни таслим этди. Мезбонлар вакили биринчи сетнинг биринчи геймида сўнг курашни давом эттира олмаслигини маълум қилган ва бунинг натасижасида Фомин осонлик билан кейинги босқичга йўл олган. 

Таққослаш учун, Сергей Фомин ATP рейтингида 730, Атлангериев 1363, Туркер эса 1657-поғонадан жой олган. Турнирда бешинчи рақам остида таснифланган ҳамюртимиз бугун ярим финал чиптаси учун дунёнинг 1080-ракеткаси бўлиб турган россиялик Максим Жуковга қарши кортга чиқади.