Шаҳрулло Маҳмудов Осиё ўйинларига тайёргарлик жараёни билан танишмоқда

Ханчжоу-2022 ўйинлари 12 минг нафар спортчини жамлаши кутилмоқда. Ўзбекистон спорт делегацияси 33 та спорт турида 400 нафардан зиёд спортчи билан қатнашиши режалаштирилган. Айни кунларда ушбу тарихий Осиё ўйинлари олдидан Хитойда бир қатор тадбирлар ўтказилмоқда.

Шу кунларда қитъа спортининг бир гуруҳ мутасаддилари қатори Ўзбекистон Республикаси Ёшлар сиёсати ва спорт вазири ўринбосари, Осиё оғир атлетика федерацияси вице-президенти Шаҳрулло Маҳмудов оғир атлетика мусобақаларини ўтказиш техник комиссияси вакили сифатида ўйинларга кўрилаётган тайёргарлик жараёнларини кўздан кечирмоқда.

Тайёргарлик жараёнлари билан танишув асносида Шаҳрулло Маҳмудовга Осиё оғир атлетика федерацияси ижроий қўмитаси аъзолари, Ханчжоу-2022 ўйинларини ўтказиш ташкилий қўмитаси вакиллари ҳамроҳлик қилмоқда.

Сафар давомида Ўзбекистон Республикаси Ёшлар сиёсати ва спорт вазири ўринбосари, Осиё оғир атлетика федерацияси вице-президенти Шаҳрулло Маҳмудов Ханчжоу-2022 ўйинларининг оғир атлетика мусобақалари ўтадиган спорт иншооти ва унда спортчилар, техник делегатлар, ҳакамлар учун яратилган шарт-шароитлар билан танишди.

Оғир атлетика мусобақаларини ўтказиш ташкилий қўмитаси аъзолари техник комиссия вакилларига тайёргарлик ҳолатлари ҳақида сўзлаб берди.

Ўз навбатида, техник комиссия аъзолари, хусусан Ш. Маҳмудов мутахассисларга оғир атлетика мусобақаларини ташкил этишда юзага келадиган техник-тактик ҳолатлар, мусобақаларни ўтказиш учун фаолият кўрсатадиган ҳар бир бўлим, ҳакамлар корпуси, ёрдамчи волонтёрлар иш самарадорлигини таъминлаш борасида керакли маслаҳатларни бериб ўтди.