Шакур Стивенсон Теофимо Лопесга қарши жангдан кейин WBC камаридан айрилди

"Чемпион Стивенсон энди WBC қоидалари ва регламентига кўра, биринчи ярим ўрта вазн тоифаси WBO йўналишида амалдаги жаҳон чемпиони эканлигини инобатга олиб, ташкилот енгил вазндаги жаҳон чемпионлик унвонини вакант деб эълон қилади. WBC тез орада енгил вазн тоифасида янги жаҳон чемпионини аниқлаш жараёни ҳақида қўшимча маълумот беради", - дейилади Бутунжаҳон бокс кенгаши баёнотида.

Шакур бу қарори учун ташкилотни танқид остига олди. Шу билан бирга, Стивенсоннинг таъкидлашича, у WBC’га Лопес билан жанг учун санкция тўловини тўлашдан бош тортгани учун камаридан маҳрум бўлган.

"Бунга лойиқ бўлмаган қандайдир фирибгарларга 100 минг доллар? WBC’нинг бу жангга умуман алоқаси йўқ ва бу уларни ич-ичидан кемиради. Камарингизни олинг - у мени аниқламайди. Ва мен бу йигитларга охирги жангим учун ҳозиргина пул тўладим. Нега мен ҳозироқ сизга 100 мингни беришим керак экан? Чунки сизда Кроуфорд билан зиддият бор ва сиз мен билан ўйнашишга қарор қилдингиз", - деб ёзди америкалик боксчи ижтимоий тармоқдаги саҳифасида.

Ўтган йилнинг охирида Теренс Кроуфорд Сауль Альварес билан жанг учун WBC санкция тўловини тўлашдан бош тортган ва иккинчи ўрта вазнда чемпионлик камаридан, у билан бирга мексикалик билан жангда қўлга киритилган мутлақ жаҳон чемпиони унвонидан ҳам маҳрум бўлди. Ушбу ҳолатга изоҳ берар экан, Кроуфорд Жаҳон бокс кенгашини жангчилардан йиғилган пуллар WBC раҳбарияти учун саёҳатлар, ҳашаматли люкслар ва ресторанларда қиммат кечки овқатларни молиялаштиришга сарфланаётганликда айблади.