Sharjah Masters. Бугун 3-турда ўзбек дербисига гувоҳ бўламиз

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда.

Бугун мусобақанинг 3-тур учрашувлари ўтказилади ва биз учун аҳамиятлиси унда ўзига хос ўзбек дербисига гувоҳ бўламиз. Дастлабки икки турда дуранг ўйнаган Нодирбек Абдусатторов қора доналарда Жаҳонгир Воҳидовга қарши баҳс олиб боради. Биринчи турда мағлубиятга учраган Воҳидов иккинчи партияда ғалаба қозонганди. 

Sharjah Masters 2025 турнирининг 3-турида Ортиқ Ниғматов оқ доналарда АҚШ шахматчиси Акобян Варужан билан ҳисоб-китоб қилади. Ниғматов кеча 2-турда ҳиндистонлик Санкалп Гуптани таслим этганди. Муҳиддин Мадаминов 3-турда айнан Гупта билан тўқнаш келади. 

Учинчи тур олдидан уч шахматчи - Даи Чангрен (Хитой), Александар Инжич (Сербия) ва Висаҳ (Ҳиндистон) юз фоизлик натижа билан пешқадамик қиляпти. Йигирма етти иштирокчи ҳисобида 1,5 тадан очко бор. Улар орасида Ортиқ Ниғматов ҳам бор. У қўшимча кўрсаткичларга кўра 18-ўринни эгаллаб турибди. Бир очкодан жамғарган Нодирбек Абдусатторов қўшимча коэфицентларга кўра 46, Жаҳонгир Воҳидов 52-поғонадан жой олган. Муҳиддин Мадаминов 0,5 очко билан 63-ўринда бормоқда.