Sharjah Masters. Бугун 4-турда яна ўзбек дербисига гувоҳ бўламиз

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда. 

Бугун мусобақада 4-тур учрашувлари бўлиб ўтади ва 3-турда бўлгани сингари яна ўзига хос ўзбек дербисига гувоҳ бўламиз. Жаҳонгир Воҳидовга қарши баҳсда турнирдаги илк ғалабасини қўлга киритган Нодирбек Абдусатторов бугун 4-турда оқ доналарда яна бир ҳамюртимиз Ортиқ Ниғматовга қарши баҳс олиб боради. Ниғматов 2 ғалаба ва 1 дуранг билан турнир жадвалида Нодирбекдан юқорида бормоқда.

Sharjah Masters 2025 турнирининг 4-турида Муҳиддин Мадаминовни жиддий синов кутиб турибди. У қора доналарда мезбонлар вакили Салем Салеҳ билан ҳисоб-китоб қилади. Жаҳонгир Воҳидов эса қора доналарда хитойлик Панг Таога қарши ўйнайди. Биринчи доскада икки яримтадан очко жамғарган россиялик Иван Землянский ва нидерландиялик Аниш Гири учрашуви бўлиб ўтади. 

Тўртинчи тур олдидан тўққиз нафар шахматчи 2,5 тадан очко жамғариб, 1-9 ўринларни банд этган. Улар орасида Ортиқ Ниғматов ҳам бор. Ҳамюртимиз қўшимча кўрсаткичларга кўра 8-ўриндан жой олган. Учинчи турдан сўнг очко йўқотмаган шахматчининг ўзи қолмади. Икки очкога эга Нодирбек Абдусатторов қўшимча коэфицентларга кўра 46-поғонадан 26-ўринга кўтарилиб олди. Муҳиддин Мадаминов 1, 5 очко билан 43, Жаҳонгир Воҳидов эса 1 очко била 64-поғонадан жой олган.