Шавкат Раҳмонов UFC боссларидан жанг сўради

Биринчиси - енгилмас қозоғистонлик яримўрта вазн тоифаси вакили жорий йилда октагонга қайтмайди. Иккинчиси - у ташкилотдан келаси йилнинг бошида жанг қилишни сўради. Бу ҳақда "Номад"нинг жамоадоши Фанил Рафиков Namys Fighting подкастида маълум қилди.

"Шавкат келаси йил бошида жанг қилишни сўради ва ҳозир рақибини кутмоқда. Ўйлайманки, унинг қайтишига қадар дивизиондаги кўплаб ўринлар ўзгаради. Балки чемпион ўзгарар, етакчилар ўзгарар. Чунки ноябрь ойидаёқ Пратес-Эдвардс жанги эълон қилинган, Брэди эса рақиб изламоқда. Ҳозирча бу энг қизиқарли дивизионлардан бири ва бу тарихни томоша қилиш жуда ҳам қизиқ бўлади. Шавкатни тезроқ октагонда кўришни истардим ва катта эҳтимол билан биз Белал Муҳаммад билан жангни кўрамиз", - деди Рафиков.

Маълумот учун, 30 ёшли Шавкат Раҳмонов сўнгги жангини ўтган йилнинг декабрь ойида ўтказганди. Ўшанда у ҳакамларнинг якдил қарори билан Иен Мачадо Гаррини мағлуб этганди.