Шавкат Раҳмоновнинг режалари очиқланди

Сурхондарёда дунёга келган ва бир неча йилдан бери Қозоғистон шарафини ҳимоя қилаётган Раҳмонов октагонга қайтиш мақсадида машғулотларни бошлади. У Ислам Махачев ва Жек Делла Маддалена ўртасидаги жанг ғолибига қарши чемпионлик баҳсида октагонга чиқишига умид билдирмоқда. Бу ҳақда унинг мураббийи Эдуард Базров интервью берди.

"Албатта, биз ҳеч қандай даъвогарлик жангисиз чемпионлик баҳси берилишини хоҳлаймиз. Лекин қоидаларни четлаб ўтолмаймиз. Ҳозирги ҳолатда энг яхши вариант Махачев – Маддалена жанги ғолибини кутиш. Бу жангни суғурталаш, яъни захира жангчиси бўлиш таклифи бўлмади. Бўлган тақдирда ҳам биз бу таклифга рад жавобини берамиз. Биз ўз режамиз асосида машғулотларни бошладик. Шавкат ва қолган жамоамиз аъзолари ҳам шу фикрда. Раҳмонов режа асосида ишлашда давом этади. Бокс, кураш, жисмоний тайёргарлик, зарба техникаси устида ишлаймиз", – деди Базров. 

Шуннингдек, Базров ўз сўзида давом этиб, навбатдаги рақиб америкалик Шон Брэди бўлишини инкор этди. Брэди - Раҳмонов жанги ноябрь ойида Қатардаги UFC турнирида ўтказилиши ҳақида хабар тарқаганди.

"Бу хабарни сиздиришди. Лекин мен бу жанг ҳақида ҳеч қандай маълумотга эга эмасман. Шавкат ҳам, жамоамиздагилар ҳам бу ҳақда билишмайди. Бизга ҳеч ким расмий мурожаат билан чиқмади. Менежеримиз Саят Абдрахманов билан доимий алоқадамиз. Қандай янгилик бўлса, биринчи у билади ва бизга етказади", – дея сўзларига якун ясади мураббий. 

Маълумот учун, яримўрта вазн чемпиони Жек Делла Маддалена ва россиялик даъвогар Ислам Махачев ўртасидаги жанг ноябрь ойида Нью-Йорк шаҳрида ташкил этиладиган UFC 322 турнири доирасида бўлиб ўтади.