Шахматчиларимиз Бутунжаҳон Ўсмирлар Олимпиадасида Ҳиндистон ва Канадага қарши баҳс олиб боришди

Нуфузли мусобақада дунёнинг 45 давлатидан 90 та жамоа бош соврин учун баҳс олиб бормоқда. Ўзбекистон терма жамоаси мусобақада ўртача рейтинг бўйича 2-ўринда қайд этилган. Халқаро гроссмейстер Сайдали Юлдашев бош мураббийлигидаги Ўзбекистон терма жамоаси таркибида халқаро спорт усталари Ҳумоюн Бегмуратов (2435), Муҳаммадзоҳид Суяров (2356), FIDE спорт устаси Асроржон Омонов ва аёллар халқаро спорт устаси, ёшлар ўртасида икки карра жаҳон чемпиони Афруза Ҳамдамова дона сурмоқда. 

Кеча Олимпиадада иккита тур учрашувлари ўтказилди. Ўсмирларимиз аввалига 7-турда асосий рақиб Ҳиндистон терма жамоасига 1,5:2,5 ҳисобида имконияни бой бериб қўйишди. Кейин эса 8-турда Канада шахматчилари 3,5:0,5 ҳисобида таслим этилди. FIDE 1 жамоаси 8 та учрашувнинг барчасида ғалаба қозониб, турнир жадвалида якка пешқадам бўлиб турибди. 

Ўзбекистон терма жамоаси Олимпиаданинг 8-туридан сўнг 6 ғалаба ва 2 мағлубият билан 12 очко жамғарган ҳолда қўшимча кўрсаткичларга кўра 4-ўринни эгаллаб турибди. FIDE 2 жамоаси 13 очко билан иккинчи ўринни банд этган бўлса, Қозоғистон 1 жамоаси биз сингари 12 очко билан кучли учликка якун ясаган. Ҳиндистон, Қозоғистон 2, Колумбия 1, Италия ва Хитой терма жамоалари ҳисобида ҳам 12 очкодан бор. 

Бугун сўнгги 9-турда Ўзбекистон терма жамоаси Италия шахматчиларига қарши баҳс олиб боради. Биринчи доскада FIDE 1 ва FIDE 2 терма жамоалари ўзаро муносабатларига ойдинлик киритиб олади.