Шахматчиларимиз U-16 Бутунжаҳон Ўсмирлар Олимпиадасида яна икки учрашув ўтказишди

Нуфузли мусобақада дунёнинг 45 давлатидан 90 та жамоа бош соврин учун баҳс олиб бормоқда. Ўзбекистон терма жамоаси ўртача рейтинг бўйича 2-ўринда қайд этилган бўлиб, шахматчиларимиз Бутунжаҳон Олимпиадасини кетма-кет 3 та ғалаба билан бошлашганди.   

Халқаро гроссмейстер Сайдали Юлдашев бош мураббийлигидаги Ўзбекистон терма жамоаси таркибида халқаро спорт усталари Ҳумоюн Бегмуратов (2435), Муҳаммадзоҳид Суяров (2356), FIDE спорт устаси Асроржон Омонов ва аёллар халқаро спорт устаси, ёшлар ўртасида икки карра жаҳон чемпиони Афруза Ҳамдамова дона сурмоқда. 

Кеча Олимпиадада иккита тур учрашувлари ўтказилди. Ўсмирларимиз аввалига 4-турда Қозоғистон 2 жамоасини 3:1 ҳисобида мағлуб этишди. Бешинчи турда эса мусобақа рейтинг пешқадами FIDE 1 жамоасига 0,5:3,5 ҳисобида имкониятни бой бериб қўйишди. Муҳаммадзоҳид Суяров гроссмейстер Иван Землянский билан дуранг ўйнади. Қолган шахматчиларимиз гроссмейтер рақибларига ютқазиб қўйишди. Шу тургача 4 та учрашувда ғалаба қозонган Ҳиндистон ва Колумбия 1 терма жамоалари баҳсида ҳиндлар 3:1 ҳисобида устун келишди.  

Ўзбекистон терма жамоаси Олимпиаданинг 5-туридан сўнг 4 ғалаба ва 1 мағлубият билан 8 очко жамғарган ҳолда қўшимча кўрсаткичларга кўра 5-ўринни эгаллаб туришибди. Барча учрашувларда ғалаба қозонган Ҳиндистон ва FIDE 1 жамоалари 10 очкодан тўплаб, турнир жадвалида қўшҳокимлик қилишяпти.  

Бугун 6-турда Ўзбекистон терма жамоаси FIDE 2 жамоасига қарши баҳс олиб боради. Биринчи доскада Ҳиндистон ва FIDE 1 терма жамоалари ўзаро муносабатларига ойдинлик киритиб олишади.