Шоҳжаҳон Эргашев 28 март куни ўтказиладиган жангига муносабат билдирди

Ҳамюртимиз 28 март куни АҚШнинг Мичиган штати, Детройт шаҳрида ташкил этиладиган DAZN ҳамда Salita Promotions ҳамкорлигидаги проф бокс оқшомида рингга кўтарилади. Ўша куни унга панамалик чарм қўлқоп устаси Хуан Хуертас рақиблик қилади.

"Тўрт ойлик танаффусдан кейин яна рингга қайтяпман. Дуода бўлган барчага катта раҳмат. Қўлдан келганича ғалаба учун ҳаракат қиламан. Чемпионлик камари учун яна қайтадан уринишни бошлаймиз. Америкадаги юртдошларимиз 28 март кунги жангда келиб қўллаб- қувватлайсизлар деган умиддаман", - деди Эргашев. 

Маълумот учун, Хуан Хуертас фаолияти давомида 22 та жанг ўтказиб, 17 ғалаба, 4 мағлубият ва 1 дуранг қайд этган. Ғалабаларининг 13 тасида рақибларини муддатидан олдин таслим этган. 

Эслатиб ўтамиз, Шоҳжаҳон Эргашев ўтган йилнинг 26 ноябрь куни АҚШда IBF чемпиони Сабриэль Матиасга қарши жанг қилиб, имкониятни бой бериб қўйган эди. Бу унинг фаолиятидаги ягона мағлубият бўлиб турибди.