Шоҳжаҳон Эргашев энди бошқа бир ўзбекни жангга чақирди

Эргашевнинг айтишича, у яна бир ўзбек боксчиси Шаҳобиддин Эгамов билан аввал бир неча бор спарринг қилган.

"65 кг вазнда чемпионлик камари учун жанг қиладиган Эгамов билан залда ўн мартадан ортиқ спарринг қилганмиз. Бироқ у мен билан бир раунд ҳам чидай олмади. Буни унинг кўзига қараб ҳам айта оламан", деди Эргашев.

Спортчи улар ўртасида кичик можаро ҳам бўлганини, ўшанда Эгамов унга "кулачка"да жанг қилишни таклиф қилгани ва у бунга рози бўлганини айтди.

Эргашевнинг таъкидлашича, унинг асосий жанг вазни 63 кг бўлса-да, 65 кг вазн тоифасида ҳам муаммосиз жанг қила олади.

"Агар Дастанни мағлуб этсам ва ҳаммаси кўнгилдагидек ўтса, номим ҳисобига лига кейинги жангдаёқ чемпионлик жангини бериши мумкин. Мен 65 ва 70 кг вазндаги чемпионларни жангга чақираман", дейди у.

Ҳозирча Эргашев ва Эгамов ўртасидаги эҳтимолий жанг расман эълон қилинмаган.