Shymkent Challenger 2. Фоминни "сочиб" ташлашди, иккинчи сетда "сухой" қайд этилди

Бу ҳафта учун мўлжалланган мукофот жамғармаси 63 000 АҚШ долларини ташкил этувчи Shymkent Challenger 2 турнирида 25 ёшли ҳамюртимиз ҳам ўз омадини синаб кўрди. Фомин илк даврада нидерландиялик 30 ёшли Йелле Селсни мағлубиятга учратган эди. 

Афсуски, бироз аввал якунига етган 1/8 финал баҳсида ҳамюртимиз германиялик Макс Ганс Ребергга 2/6, 0/6 ҳисобида имкониятни бой берди. Теннисчимизнинг кортда кайфиятсиз, иштиёқсиз, жуда оғир ҳаракат қилганини кўриш мумкин. Жуда ғалати мағлубият. Фомин бу ўйинга умуман тайёр эмас экан.  

Таққослаш учун, Сергей Фомин ATP рейтингида 359, 22 ёшли Макс Ганс Реберг эса 641-ўринни эгаллаб турибди. Олтмиш тўрт дақиқа давом этган учрашувда Сергей 6 та қўшхатога йўл қўйди, биронта ҳам эйс зарбасини амалга ошира олмади. Реберг эса аксинча, умуман қўшхатога йўл қўймади. Учта эйс зарбасини ижро этди. Бу теннисчиларнинг ўзаро ўтказган илк учрашуви бўлди.