Синдаров ҳамон Grand Chess Tour: Saint Louis Rapid & Blitz 2026 пешқадамлар сафида

Ушбу нуфузли турнирда ҳамюртимиз Жавоҳир Синдаров ҳам муваффақиятли дона сурмоқда. Мусобақанинг иккинчи куни рапид бўйича яна учта тур учрашувлари ўтказилди. Бу сафар ҳам Жавоҳир мағлубиятга учрамади. У ўтказилган учта партияда рақиблари билан дурангга имзо чекди. Тўртинчи турда пешқадам Рамешбабу Праггнанандҳа (Ҳиндистон), 5-турда Левон Аронян (АҚШ), 6-турда эса қора доналарда Фабиано Каруана (АҚШ) билан муросага келди. 

Иккинчи кунги баҳслардан сўнг ҳиндистонлик Рамешбабу Праггнанандҳа пешқадамлигини сақлаб қолди. У 9 очко билан турнир жадвалида карвонбошилигини давом эттирмоқда. Бир ғалаба ва 5 дурангга эга Жавоҳир Синдаров 7 очко билан соф 2-ўринни банд этган. Беш нафар гроссмейстер ҳисобида 6 очкодан бор.    

Бугун рапид бўйича сўнгги 3 та тур партиялари ўйналади. Учрашувлар бизнинг вақт билан соат 22:00да бошланади. Еттинчи турда Жавоҳир оқ доналарда америкалик Леньер Домингесга қарши баҳс олиб боради. 

Маълумот учун, учрашувлар рапид ва блиц йўналишларида ташкил этилади. Рапидда вақт назорати 25+10, блицда эса 5+2 форматида бўлиб ўтади. 

Иштирокчиларнинг тўлиқ таркиби: Жавоҳир Синдаров (Ўзбекистон), Фабиано Каруано, Левон Аронян, Уэсли Со, Леньер Домингес, Авондер Лианг (барчаси АҚШ), Винсент Кеймер (Германия), Аниш Гири, Йорден ван Форест (иккиси ҳам Нидерландия), Рамешбабу Праггнанандҳа (Ҳиндистон).