Собиқ UFC чемпионини 65 сонияда бўғиб қўйишди

FURY Pro Grappling 6 турнири доирасида биринчи енгил вазн тоифасида собиқ UFC чемпиони Роуз Намаюнас дивизион вакиласи Жиллиан Робертсонга қарши жанг олиб борди. Ўн дақиқага мўлжалланган жанг 65-сонияда тўхтатилди. 

Канадалик аралаш яккакураш устаси америкалик номдор рақибасини бўғиш усули билан мағлубиятга учратиб, унга греппингнинг кучини кўрсатиб қўйди. 27 ёшли Жиллиан Робертсон ҳам 2017 йилдан бери UFC турнирларида ўз жангларини ўтказиб келяпти. Унинг ҳисобида 13 та жангдан 8 ғалаба, 5 мағлубият бор. Робертсон сўнгги жангини 2022 йилнинг сентябрь ойида россиялик Мария Агаповага қарши ўтказиб, рақибасини худди кечагидек ортдан бўғиш усули эвазига таслим этганди.

30 ёшли Роуз Намаюнас эса 2022 йилнинг май ойида UFC чемпионлик камарини бой берганди. Беш раунд тўлиқ давом этган жангда у Карла Эспарзага очколар ҳисобига кўра ютқазиб қўйган эди. Карлага қарши кечган жанггача Намаюнас 3 ғалабали серия билан келаётганди.