Спорт вазири ўринбосари бугунги финал олдидан Навбаҳор Ҳамидова билан учрашди

Бугун, 6 июль куни Қозоғистонда давом этаётган World Boxing кубоги баҳсларида финал жанглари бўлиб ўтади. Кеча мазкур нуфузли мусобақа олдидан Қозоғистонда хизмат сафарида бўлиб турган Спорт вазири ўринбосари Шаҳрилло Маҳмудов “World Boxing” кубогида муносиб натижаларни қайд этаётган бокс бўйича Ўзбекистон аёллар жамоаси аъзолари билан суҳбатлашди.

Мулоқот давомида жаҳон кубогида бронза медалларини қўлга киритган Феруза  Казакова, Азиза Зокирова, Соҳиба Рўзметова ҳамда бугун олтин медаль учун жангларда қатнашадиган Навбаҳор Ҳамидоваларнинг эришаётган натижалари Ўзбекистон боксчи қизларининг янги ғалабалар сари ташланган муҳим қадами эканлиги таъкидланди.

Айтиш лозим, бугун боксчи қизимиз Навбаҳор Ҳамидова -65 килограмм оғирликда ўзининг доимий рақибларидан бири туркиялик Олимпия ўйинлари ғолиби, уч карра Жаҳон чемпиони Бусеназ Сурменелига қарши рингга кўтарилади.

Навбаҳор Бусеназ билан сўнгги бор жорий йил март ойида Жаҳон чемпионати финалида тўқнаш келганди ва кумуш медаль билан кифояланганди.

Тўлқин Рўзиев тайёрлади