Спорт вазирлигида паралимпия ҳаракатини ривожлантиришга бағишланган тақдимот бўлиб ўтди

Асосий эътибор "Лос-Анжелес 2028" Паралимпия ўйинларига тайёргарлик, спорт турларини кенгайтириш ва спортчиларни самарали тайёрлашга қаратилди.

Шунингдек, қурилаётган Олимпия шаҳарчаси ҳудудида паралимпия тизимини шакллантириш, адаптив спорт турлари учун алоҳида шароит яратиш, инклюзив машғулот жараёнларини йўлга қўйиш масалалари кўриб чиқилди. Ҳозирда Давлатимиз раҳбари топшириғига мувофиқ, шаҳарча ҳудудида параспортчилар учун 400 ўринли ётоқхона қурилиши олиб борилмоқда.

Тадбир давомида 2027-йилда юртимизда Пара енгил атлетика бўйича Жаҳон чемпионатини қабул қилиш имкониятлари ҳам муҳокама қилинди. Мазкур мусобақа Паралимпия ўйинлари учун лицензия берувчи аҳамиятга эга бўлиб, унинг ўтказилиши "Лос-Анжелес 2028" паралимпия ўйинларига тайёргарликнинг муҳим босқичи ҳисобланади.