Стивен Фултон WBC ва WBO камарларини Дэниэль Романдан ҳимоя қилди

Оқшомнинг марказий жанги иккинчи енгил вазн (55,3 кг) тоифасида WBC ва WBO йўналишлари чемпиони Стивен Фултон ҳамда даъвогар Даниэль Роман зртасида ўтказилди. Америкалик боксчилар ўртасидаги ушбу чемпионлик жанги тўлиқ 12 раунд давом этди. 

Якунда Фултон ҳакамларнинг якдил қарори билан 119-109, 120-108, 120-108 ҳисобларида ғалаба қозониб, ўзига тегишли бўлган WBC ва WBO чемпионлик камарларини сақлаб қолди. Мағлубиятни нималигини билмай келаётган 27 ёшли Стивен фаолиятидаги 21-ғалабасини (8 та нокаут) тантана қилди. 

Собиқ жаҳон чемпиони Роман эса тўртинчи мағлубиятини қабул қилиб олди. Мағлубиятлардан бири ҳамюртимиз Муроджон Аҳмадалиев томонидан тақдим этилганди. Ҳисобида 29 ғалаба (10 нокаут) ва бир дуранг ҳам бор. 

Жангдан сўнг Стивен Фултон асосий мақсади ўз дивизионидаги барча камарларни бирлаштириш эканлигини айтди. Ушбу вазнда WBA ва IBF чемпионлик камарлари Муроджон Аҳмадалиевга тегишли. Чарм қўлқоп устамиз 2020 йилда айнан Романдан WBA ва IBF камарларини тортиб олган эди.