Султонов Верона "Челленжер" турнири "финал"ида кортга чиқди

Мукофот жамғармаси 45 730 еврони ташкил этувчи ушбу турнирда ҳамюртимиз Ҳумоюн Султонов ҳам ўз имкониятини синаб кўрди. Теннисчимиз ўз иштирокини саралаш баҳсларидан бошлаган ва 1/2 финалда италиялик Самуэль Сегеттини 6/3, 6/1 ҳисобида мағлуб этганди.

Афсуски, турнирда 12-рақам остида сараланган Ҳумоюн ҳозиргина якунига етган ва асосий тўрга йўлланма берган драматик финал учрашувида бразилиялик Боскардин Диасга имкониятни бой бериб қўйди. Ҳумоюн биринчи сетда рақибига биронта ҳам гейм бермади - 6/0. Иккинчи сетда Диас 7/5 ҳисобида зафар қучди. Ҳал қилувчи учинчи сетда Султонов матчболдан фойдалана олмади ва якунда тай-брекда рақибига ютқазиб қўйди - 6/7(5).   

Икки соату 54 дақиқа давом этган учрашувда Ҳумоюн 4, Диас 5 та эйс зарбани амалга оширган. Қўшхатолар ҳар икки теннисчида ҳам 3 тани ташкил этди. Бу уларнинг ўзаро ўтказган илк учрашуви эди.    

Таққослаш учун, Ҳумоюн Султонов ATP рейтингида 394, Диас эса 336-ўринни эгаллаб турибди. Бешинчи ракетка сифатида қайд этилган Боскардин Диас асосий тўрга йўлланма олди.