SuperUnited Rapid & Blitz Croatia 2026 старт олди. Абдусатторов илк кунги 3 та партияда қандай натижа қайд этди?

Grand Chess Tour’нинг учинчи босқичи ҳисобланган SuperUnited Rapid & Blitz Croatia 2026 турнирида ҳамюртимиз Нодирбек Абдусатторов ҳам иштирок этяпти. Мусобақа рапид ва блиц бўйича ўтказилаётган бўлиб, 10 нафар гроссмейстер бош соврин учун баҳсларга киришди. 

Турнир иштирокчилари: Нодирбек Абдусатторов, Алирежа Фирузджа, Максим Вашье-Лаграв (иккиси ҳам Франция), Рамешбабу Праггнанандҳа, Гукеш Доммараджу (иккиси ҳам Ҳиндистон), Аниш Гири, Йорден Ван Форест (иккиси ҳам Нидерландия), Винсент Кеймер (Германия), Богдан-Даниель Дик (Руминия), Иван Сарич (Хорватия).

Мусобақа формати ва вақт назорати:

Рапид: 25 дақиқа + 10 сония (9 раунд)

Блиц: 5 дақиқа + 2 сония (18 раунд)

Турнирнинг дастлабки куни рапид бўйича 3 та тур партиялари ўйналди. Нодирбек Абдусатторов Богдан-Даниэль Дик ва Аниш Гири билан дуранг қайд этиб, германиялик Винсент Кеймерга имкониятни бой бериб қўйди. Икки очко жамғарган ҳамюртимиз ҳозирча 10 иштирокчи орасида 8-поғонада бормоқда. Бугун 4-турда у француз Максим Вашье-Лагравга қарши дона суради.