Таеквондо ITF: спортчиларимиз жаҳон чемпионатининг илк кунида 6 та медални қўлга киритди

Мусобақада Ўзбекистон таеквондо ITF ассоциацияси раиси Лазиз Ҳасанов бошчилигидаги Ўзбекистон спорт делегацияси ҳам муваффақиятли иштирок этмоқда.

Кеча, 14-декабрь куни Жаҳон чемпионатининг якка ва жамоавий тул баҳслари ўтказилди. 14-17 ёшлилар ўртасида ўтказилган якка тул баҳсларида Владимир Ли терма жамоамиз ҳисобига олтин медал тақдим этди.

Эътиборлиси, фахрийлар ўртасида ўтказилган якка тул баҳсларида ҳам чемпион бизнинг вакилимиз бўлди. Спортимиз фидойиси Музаффар Зоитов энг яхши деб топилди ва олтин медал билан тақдирланди.

Шунингдек, якка тул баҳсларида спортчиларимиз 1 та кумуш ва 2 та бронза медалларини қўлга киритишди. Шу билан бирга, нуфузли мусобақанинг жамоавий тул баҳсларида 14-17 ёшли таеквондочиларимиз ҳам кумуш медал эгасига айланишди.

Бугун, 15-декабрь куни таеквондочиларимиз яккалик ва жамоавия массоги йўналишларида ғолиблик учун курашга киришади.