Tata Steel Chess 2026. Ўзбек шахматининг Вейк-ан-Зеедаги триумфи. Нодирбек чемпион, Жавоҳир иккинчи! (+ФОТО)

Турнирнинг кучлилар жам бўлган "Мастерс" гуруҳида дунёнинг етакчи 14 гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боришди. Кеча ўтказилган сўнгги 13-тур учрашувларида шахматчиларимиз қора доналарда ўйнаганликларига қарамай, рақибларини мағлубиятга учратишди. 

Абдусатторов чемпионлик матчида Ҳиндистоннинг айни пайтдаги биринчи рақамли шахматчиси Аржун Эригаисини чиройли усулда мағлуб этди. Жавоҳир Синдаров мусобақа жадвалида сўнгги ўринни эгаллаб турган чехиялик Тай Даи Ван Нгуэндан устун келди. 

Шу тариқа, Нодирбек Абдусатторов 13 имкониятдан 9 очко жамғариб, тўртинчи уринишда Tata Steel Chess 2026 чемпионлигини қўлга киритди. Жавоҳир Синдаров 8,5 очко билан соф иккинчи ўринни эгаллади. Мезбонлар вакили Йорден ван Форест 7,5 очко тўплаган ҳолда, қўшимча кўрсаткичларга кўра совринли учинчи ўринни банд этди. Америкалик Ҳанс Ниеманн ва германиялик Винсент Кеймер 7,5 очко билан Топ-5`га якун ясаб беришди. 

Мусобақанинг ўтган йилги чемпиони ҳиндистонлик Рамешбабу Праггнанандҳа эса 5,5 очко билан 11-поғонадан жой олди. Амалдаги жаҳон чемпиони Гукеш Доммаражу (Ҳиндистон) 13 имкониятдан 6,5 очко тўплади ва 10-ўрин билан кифояланди. У сўнгги турда оқ доналарда германиялик Винсент Кеймер билан муросага келди. 

Tata Steel Chess 2026. 13-тур натижалари:

Владимир Федосеев (Словения) — Аравиндҳ Читамбарам (Ҳиндистон) 1-0

Маттиас Блубаум (Германия) — Ягиз Каан Эрдогмуш (Туркия) 0,5-0,5

Рамешбабу Прагнанандҳа (Ҳиндистон) — Йорден ван Форест (Нидерландия) 0,5-0,5

Аржун Эригаиси (Ҳиндистон) — Нодирбек Абдусатторов (Ўзбекистон)  0-1

Тай Даи Ван Нгуэн (Чехия) — Жавоҳир Синдаров (Ўзбекистон) 0-1 

Аниш Гири (Нидерландия) — Ҳанс Ниеманн (АҚШ) 0,5-0,5

Гукеш Доммаражу (Ҳиндистон) — Винсент Кеймер (Германия) 0,5-0,5