30 сен 15:26
Янгиликлар

Бокс/ММА

Тайсон Фьюри ва Александр Усик мутлақ чемпионлик жанги учун шартнома имзолади

Супер оғир вазн тоифасида WBC чемпиони Тайсон Фьюри WBA, IBF, WBO ва IBO камари соҳиби Александр Усикка қарши мутлақ жаҳон чемпиони унвони учун жанг қилади.

Бу ҳақда ESPN спорт шарҳловчиси Майк Коппингер маълум қилди.

"Тайсон Фьюри ва Александр Усик 23 декабрь ёки январда Саудия Арабистонида бўлиб ўтадиган мутлақ жаҳон чемпионлик жанги бўйича шартнома имзолади", — деб ёзади мухбир ижтимоий тармоқда.

Александр Усик сўнгги жангида Дениэль Дьюбоисни нокаутга учратган эди, Тайсон Фьюри эса охирги марта ўтган йилнинг декабрь ойида Дерек Чисорани ўнинчи раундда нокаутга учратган.

Шу йилнинг баҳорида украиналик ва британиялик мутлақ чемпионлик бўйича музокаралар олиб боришган эди, аммо кейинчалик томонлар келишувга эриша олишмаган.

Эслатиб ўтамиз, 28 октябрь куни Ар-Риёдда Фьюри ва собиқ UFC чемпиони Фрэнсис Нганну ўртасидаги ўн раундлик бокс жанги бўлиб ўтади.