Теннисчиларимизнинг омадсизликлари давом этди

Жумладан, мамлакатимизнинг биринчи ракеткаси Ҳумоюн Султонов Порту Челленжерида омадини синаб кўрди. Мусобақанинг асосий тўридаги илк босқич доирасида наманганлик ракетка устаси Тунис вакили Моез Эчаргуига қарши кортга чиқди ва 1:2 (7/6, 4/6, 4/6) ҳисобида имкониятни бой берди.

Бу ўйингача Султонов ATP рейтингида 266, Эчаргуи эса 312-ўринни банд этиб турганди.

Бундан ташқари, шу кунларда Қозоғистоннинг Астана шаҳрида ҳам Челленжер таснифидаги халқаро ATP турнири ўтказиляпти. Турнирнинг саралаш баҳсларида Амир Милушев (ATP-1330) нейтрал мақомдаги спортчи Максим Жуковга (ATP-655) 1:2 (0/6, 6/3, 1/6) ҳисобида мағлуб бўлди. Илк босқичдан баҳсларга қўшилган Максим Шин (ATP-1005) эса биринчи ўйининининг ўзида имкониятни бой бериб қўйди. У малайзиялик Митсуки Вей Канг Леонг (ATP-668) олдида ожиз қолди — 0:2 (5/7, 2/6).