Термиз ОЗКда ҳам спортчилар касбий имтиҳонлар бўйича сараланаяпти

Хабарингиз бор, шу кунларда мамлакатимиздаги барча Олимпия захиралари коллежларида (собиқ ихтисослаштирилган Олимпия захиралари мактаб-интернатлари) 2020/2021 ўқув йили учун касбий (ижодий) имтиҳонлар бўлиб ўтмоқда.

Жумладан, Термиз шаҳар олимпия захиралари коллежида ҳам бу йилги имтиҳонлар ҳар доимгидан фарқли ўтказилмоқда. Аввало, бу ерда 2020/2021 ўқув йили учун қабул имтиҳонларини юқори савияда ташкил этиш бўйича барча зарур чоралар кўрилганлигини қайд этиш зарур.

Имтиҳонлар бўладиган барча секция ва спорт майдонлари тўлиқ дизенфикция қилинмоқда. Қолаверса, имтиҳон вақтида ҳам дизенфикция ишлари давом эттирилаяпти. Имтиҳонларни эса малакали мутахассислар кузатиб, баҳолаб боришади. Олий мақсад – имтиҳонларни ҳалол ва шаффоф ўтказиб, илм даргоҳига энг истеъдодли, қайсики келгусида жаҳон ареналарида Ватанимиз байроғини юқори кўтаришга қодир ёшларни саралаб олишдир.

Имтиҳонлар вақтида юзага келадиган турли хил муаммоларнинг олдини олиш ҳамда касбий (ижодий) имтиҳонларни юқори савияда ўтказиш мақсадида имтиҳон жараёнлари тўлиқ видеога ёзиб олиниши ҳам ташкил этилади. Имтиҳон бўладиган масканлар тўлиқ шай ҳолатга келтириб қўйилган.

Жорий йил Термиз шаҳар Олимпия захиралари коллежига 198 нафар ўқувчи ҳужжат топширган бўлиб, улардан 110 нафари коллежга қабул қилинади. Ўқув даргоҳига 15 та Олимпия ва иккита миллий спорт турлари йўналишларига қабул эълон қилинган бўлиб, бокс, дзюдо, эркин ва юнон-рум кураши, таэквандо ВТФ, сузиш ва албатта футбол йўналишларида рақобат анча юқори.