Термизда бел олиш ва уч кураш бўйича иккита турнир бошланди

Ўзбекистон Республикаси Жисмоний тарбия ва спорт вазирлиги ҳамда Ўзбекистон Бел олиш ва уч кураш ассоциациясининг йиллик-тақвим режасидаги мазкур мамлакат чемпионати ва кубок беллашувларида Қорақалпоғистон Республикаси, Тошкент шаҳри ва барча вилоятлардан 500 нафардан ортиқ полвонлар ғолиблик учун кураш тушишмоқда. 

Байрамона безатилган спорт залида дастлаб, мусобақанинг тантанали очилиш маросими  ташкил этилди. 

Маросимда сўз олган Термиз туман ҳокими Шуҳрат Ўринов, Ўзбекистон бел олиш ва уч кураш ассоциацияси бош котиби Носир Азизовлар спортчиларни қутлар экан, бугун мамлакатимизда спортга, хусусан миллий спорт турларига қаратилаётган эътибор ҳақида таъкидлаб, иштирокчиларга мусобақаларда  муваффақият тилашди. Шундан сўнг беллашувларга старт берилди.  

Мусобақа регламентига мувофиқ, бугун 2003-2004 йилларда туғилган ўсмирлар бел олиш кураш тури бўйича бел олиш, бел олишнинг халқа-чалиш, бел олишнинг халқа-чалишсиз йўналишларида ўнта вазн тоифасида, катталар ўртасидаги кубок беллашувларида ҳам худди шу йўналишларда ўнта вазн тоифасида беллашишади. Мусобақалар 13 декабрга қадар давом этади.