Тим ўз давлатида ўтказилган турнир ғолиблигини бегона қилмади

Ҳал қилувчи финал учрашувида дунёнинг бешинчи ракеткаси, австриялик Доминик Тим рейтингнинг 15-поғонасидан жой олиб турган аргентиналик Диего Шварцманга қарши кортга чиқди. Икки соату 25 дақиқа давом этган баҳсда мезбон теннисчи мухлислар олқишида рақибини 3/6, 6/4, 6/3 ҳисобида мағлуб этиб, бош совринни ўз мамлакатида олиб қолди. 

Учрашув давомида 26 ёшли Тим 9 та эйс зарбасини амалга оширди. 27 ёшли Шварцман эса биронта ҳам эйс зарбасини бера олмади. Австриялик теннисчи ўзаро учрашувларда энди 5:2 ҳисобида олдинда бормоқда. Тим Erste Bank Open турниридаги муваффақиятли иштироки учун 500 рейтинг очкоси ҳамда 474 295 евро мукофот пулига эга бўлди.