Тоғ чанғиси. Олимпиадага борадиган спортчимизда иккита олтин медаль

Чанғи спорт турлари Халқаро федерацияси (FIS) тақим режасига киритилган мазкур мусобақада тўрт қўшни мамлакат вакиллари Қирғизистон, Қозоғистон, Ўзбекистон ва Тожикистон терма жамоалари иштирок этишди.

Мусобақада қатнашган кўпгина спортчилар учун мазкур турнир XXIII қишки Олимпия ўйинлари олдидан сўнгги тайёргарлик босқичи сифатида хизмат қилди.

Ўзбекистон терма жамоаси мусобақада олти нафар спортчи билан иштирок этди. Турнирда юртимиз шарафини Арман Гаюпов, Комил Тўхтаев, Дамир Бухарбаев, Ролан Раимкулов, Муҳаммадали Асанов ва Улан Гаюповлар ҳимоя қилишди.  

Эътиборлиси тоғ чанғисининг слалом йўналишида иккита стартдан иборат мусобақанинг ҳар иккаласида олтин медаллар ҳамюртимиз, Пхёнчхандаги қишки Олимпия ўйинларида иштирок этадиган икки вакилимиздан бири Комил Тўхтаевга насиб этди. Шунингдек, мусобақада стартга чиққан терма жамоамизнинг яна бир аъзоси Ролан Раимкулов бронза медалига лойиқ кўрилди.