Тожикистон дзюдо Федерацияси президенти ўз лавозимида қолди

Йиғилишда дзюдо федерацияси аъзолари, мамлакат Миллий олимпия қўмитаси бош котиби Мумаммадшо Абдуллозода, ёшлар ва спорт ишлари бўйича Қўмита раиси Дилшод Назаров иштирок этди. Тожикистон дзюдо федерацияси вице-президенти Парвиз Ноёбов йиғилганларга федерациянинг 2017-2020 йиллардаги фаолияти, IJF (Халқаро дзюдо федерацияси)нинг "Мактабларда дзюдо" лойиҳасини муваффақиятли амалиётга тадбиқ этилаётгани каби масалалар юзасидан ҳисобот берди.

Парвиз Ноёбовнинг сўзларига қараганда, ушбу лойиҳа доирасида мамлакатнинг 10 та ўрта таълим мактабида махсус дзюдо тўгараклари очилиб, унинг спорт заллари татами, болалар эса кимонолар билан таъминланган. Бу мактабларда 50 нафардан зиёд ўқувчилар дзюдо сир-асророларини ўрганишаяпти.

Вице-президент ўз сўзида давом этиб, мамлакат дзюдочиларининг халқаро мусобақалардаги иштирокига ҳам тўхталди. Улар орасида Сомон Махмадбековнинг 2019 йилда ёшлар ўртасида жаҳон чемпиони бўлиши алоҳида таъкидланди. 

Ҳисобот-сайлов конференцияси якунида Нурулло Лоиков Тожикистон дзюдо Федерацияси президенти лавозимига қайта сайланди.