Токио-2020 Олимпиадаси мусобақалари томошабинларсиз ўтказилади

Қарор бугун 2020 йилги Олимпиада ташкилий қўмитаси, Халқаро Олимпия Қўмитаси (ХОҚ) ва Токио шаҳар ҳокимияти вакилларининг онлайн йиғилишида қабул қилинди.

Япония Бош вазири Йошиҳиде Суга кеча Токиода CОVID-19 юқтириш ҳолатлари кўпайгани сабабли фавқулодда ҳолат жорий этилишини эълон қилди.

Аввалроқ, Ўйинларнинг очилиш ва ёпилиш маросимлари ҳам томошабинларсиз ўтказилиши маълум бўлган, аммо VIP секторга меҳмонлар киришлари мумкин бўлганди.

Токиода фавқулодда ҳолат 22 августгача давом этади, Олимпиада эса 23 июлдан 8 августгача бўлиб ўтади.