“Токио-2020“ Олимпия ўйинлари сабабли нуфузли мусобақа бошқа санага кўчирилди

Бу ҳақда Туркиянинг спорт ва ёшлар масалалари бўйича вазири Меҳмет Муҳаррем Касапўғлу таъкидлади.

Унинг айтишича, ушбу йирик спорт тадбирини аввалига 2021 йилнинг 20-29 август кунлари ўтказиш режалаштирилган эди. Бироқ, Пандемия туфайли Олимпия ва Паралимпия ўйинларини ўтказиш вақти ўзгаргани сабабли мазкур тадбир вақтини ўзгартиришга тўғри келди. Шунингдек, Токиодаги Олимпиада ва Ислом бирдамлик ўйинларининг бир вақтга тўғри келиши спорт федерациялари ва спортчилар учун ноқулайлик келтириб чиқариши мумкинлиги таъкидланди.

«Биз тайёргарликни қизғин давом эттирмоқдамиз. Ишончим комилки, Ислом бирдамлик ўйинларини бошқа ҳамкорлар билан бирга юқори даражада ўтказишнинг уддасидан чиқамиз», – деди у.

Маълумот ўрнида айтиб ўтмоқчимиз, 2017 йил Озарбайжон пойтахти Боку шаҳрида бўлиб ўтган IV Ислом бирдамлик ўйинларида Ўзбекистон делегацияси 15 олтин, 17 кумуш ҳамда 31 бронза, жами 63 та медални қўлга киритган ҳолда 57 мамлакат орасида тўртинчи ўринга муносиб кўрилган эди.