Тўлқин Қиличев: "Фанат Қаҳрамоновда имконият катта"

Ҳозирда 53 (32 та эркаклар, 21 та аёллар)та йўлланма ўз эгасини топмаган. Ишчи гуруҳнинг маълум қилишича, ушбу квоталар барча қитъаларга боксчиларнинг Олимпия вазн тоифаларидаги рейтинг поғоналарига қараб тарқатилади. Бунда сўнгги 4 йил (2017-2021) орасида ўтказилган халқаро турнирлар инобатга олинади.

Ўзбекистон бокс терма жамоаси -75 ва -81 кг гача бўлган вазнларда олимпиадага йўлланма олмаган. Бу вазиятда терма жамоа мураббийлари қандай йўл тутишади? Olamsport.com сайти мухбири ушбу масала юзасидан терма жамоамиз катта мураббийи Тўлқин Қиличевга боғланди.

"Бунга тайёр эдик, ҳозирги шароитда кутилган эди. Энди рейтинг асосида бўлади. Бир-икки ўзгаришлар бўлиши мумкин. Лекин шу икки вазндаги йигитлар рейтингда бор. -81 кг да Дилшодбек Рўзметовнинг рейтинги жуда яхши. -75 кг да энди кўрамиз. Бу вазнни ҳал қилишимиз учун бизга бироз вақт керак. Режа асосида Олимпиадага тайёрланаверамиз", - деди терма жамоа катта мураббийи.

- Бокс мухлислари -75 кг вазн тоифасида Исроил Мадримовни кутишганди. Аммо Мадримов асосий эътиборини проф рингга қаратди ва натижада ҳаваскор боксда керакли очколар тўплай олмаган. Бундай бўлишини кўпчилик кутмаганди. Энди -75 кг да Ўзбекистондан ҳеч ким қатнаша олмайдими? Ёки Фанат Қаҳрамоновда имконият борми?

"Ҳа, Қаҳрамоновда имконият катта. Чунки у охирги жаҳон чемпионатида, қитъа лицензион турнирида иштирок этиб, рейтинг очко олган", - дея жавоб берди Тўлқин Қиличев.

Нима бўлганда ҳам Токиода барча вазнларда терма жамоамиз вакилларининг иштирокини кутамиз.