Топурия ва Оливейранинг илк face to face маросими дўстона руҳда ўтди + ФОТО

UFC 317 турнири иштирокчилари жанг олдидан илк face to face маросимини ўтказиб олишди. Оқшомнинг асосий жанги енгил вазнда Ислам Махачевдан вакант қолган UFC чемпионлик камари учун ўтказилади. Унда ушбу камарнинг собиқ соҳиби, бразилиялик Чарльз Оливейра асли келиб чиқиши грузиялик, ҳозирда Испания шарафини ҳимоя қилаётган Илия Топурияга қарши октагонга чиқади. 

Жангчиларнинг нигоҳлар тўқнашуви ўта самимий, дўстона руҳда, эҳтиросларга берилмаган ҳолатда ўтди. Ҳозирда мағлубият нималигини билмай келаётган Топурия ҳисобида 16 та ғалаба бор. Оливейра эса 35 ғалаба ва 10 та мағлубият қайд этган. 

Маълумот учун, ўтган йилнинг октябрь ойида ўтган UFC 308 турнирида Илия Топурия ярименгил вазн тоифасидаги чемпионлик камарини илк бор муваффақиятли ҳимоя қилганди. Ўшанда у америкалик Макс Холлоуэйни учинчи раундда нокаутга учратган эди. Чарльз Оливейра эса UFC 309 турнири доирасида америкалик Майкл Чендлерни очколар ҳисобига кўра мағлубиятга учратганди.