Тошкент “Челленжер”. Султонов бошдан баланд сакрай олмади

Соврин жамғармаси 75 000 АҚШ долларини ташкил қилувчи ушбу турнирнинг асосий тўр баҳсларида ҳамюртимиздан Денис Истомин, Жўрабек Каримов ва Ҳумоюн Султонов иштирок этяпти. 

Кеча теннисчиларимизнинг Тошкент “Челленжер” турниридаги иштирокини Ҳумоюн бошлаб берди. Султонов австралиялик Акира Сантилянга қарши кортга чиқди. Бир соату 34 дақиқа давом этган баҳсда дунё рейтингида 292-ўринни эгаллаб турган Яшил қитъа вакили 7:6(2), 6:4 ҳисобида ғалаба қозонди. Ҳумоюн рейтингнинг 557-поғонасидан жой олган.

Мусобақанинг биринчи ракеткаси сифатида ҳаракат қилаётган босниялик Мирза Башич илк даврада россиялик Иван Неделькодан 7:5, 6:4 ҳисобида устун келди. Башич рейтингда 75-ўринни эгаллаб турибди. Юртимизнинг биринчи рақамли теннисчиси Денис Истомин эса иккинчи рақам остида сараланган ва у ATP рейтингида 87-поғонани банд этган.