Тошкент “Катта Дубулға” турнирига тайёргарликдаги муаммолар ўрганилди

Ҳозирги эпидемиологик вазиятдан келиб чиққан ҳолда Халқаро дзюдо федерацияси мезбонларга мусобақани ташкил қилиш билан боғлиқ бир қатор жиддий талабларни қўйган. 

Бугун Миллий олимпия қўмитасида ана шундай ташкилий масалалар, ечимини кутаётган муаммолар ўрганилди. Йиғилишни МОҚ раиси ўринбосари, Ўзбекистон дзюдо федерацияси раиси Азизжон Камилов олиб борди. Унда, шунингдек, МОҚ Бош котиби Ойбек Касимов ва Ўзбекистон дзюдо федерациясининг бошқа вакиллари ҳам иштирок этишди. 

Халқаро федерация қўйган талабга кўра, делегатлар яшайдиган меҳмонхоналар бошқа меҳмонларни қабул қилмаслиги, ходимлари барча карантин талабларига мос равишда фаолият олиб бориши керак. 

Шунингдек, спортчиларнинг машғулот ўтказиши учун барча меҳмонхоналар зарур татами ва тренажёр заллари билан қопланган бўлиши шарт. Азизжон Камилов йиғилишда мазкур масалаларга алоҳида эътибор қаратиш лозимлигини таъкидлаб, ушбу йўналишда шуғулланаётган мутасаддиларга ўз ишларига масъулият билан ёндашишларини сўраб қолди. 

Йиғилишда мусобақанинг трансляция жараёнини ташкил қилиш, маҳаллий ОАВ учун матбуот анжумани ўтказиш, транспорт таъминоти, турнирда курашадиган спортчиларимизнинг тайёргарлиги каби йўналишларда ҳам тегишли топшириқлар берилди.