Тошкент вилоятида 2019 йил жисмоний тарбия ва спорт соҳасидаги ишлар сарҳисоб қилинди ФОТОГАЛЕРЕЯ

Спорт соҳаси вакиллари иштирокидаги йиғилишни вилоят жисмоний тарбия ва спорт бошқармаси бошлиғи вазифасини вақтинча бажарувчи Комилжон Адилов кириш сўзи билан очиб, Тошкент вилоятида 2019 йил мобайнида жисмоний тарбия ва спорт соҳасида қўлга киритилган ютуқ ва камчиликларни гапириб ўтди. 

2020 йил Япония пойтахти Токио шаҳри мезбонлик қиладиган навбатдаги ёзги олимпия ўйинларида вилоят спортчиларининг муваффақиятли иштирокини таъминлаш масаласига алоҳида тўхталар экан, бу масалада жиддий ёндошиш кераклиги, хусусан Ўзбекистон Республикаси Жисмоний тарбия ва спорт вазирлиги, Тошкент вилояти ҳокимлиги томонидан қўйилган вазифаларни сидқидилдан бажариш лозимлигини таъкидлаб ўтди. 

Йиғилишда шунингдек, туман ва шаҳарлар спорт бўлими бошлиқлари, жисмоний тарбия ва спорт бошқармаси ходимларининг ҳисобатлари тингланди. 

Йиғилиш сўнггида йил давомида фаол бўлган спорт бўлимлари, болалар-ўсмирлар спорт мактаблари, спорт федерациялари, 2019 йилда спорт турлари бўйича юқори натижаларга эришган спортчилар Жисмоний тарбия ва спорт вазирлиги ҳамда Тошкент вилояти ҳокимлигининг диплом ва эсдалик совғалари билан тақдирланишди. 

Шу ўринда таъкидлаш жоиз, 2020 йилда Токио шаҳрида (Япония) бўлиб ўтадиган XXXII ёзги олимпия ва XVI паралимпия ўйинларида иштирок этиш учун Тошкент вилоятидан айни пайтга қадар етти нафар (4 нафар паралимпиячи, 3 нафар олимпиадачи) спортчи йўлланмани қўлга киритган бўлиб, бу кўрсаткични яна ҳам яхшилаб, йўлланмалар сонини ўттиздан ошириш режалаштирилган. 

Илҳом РАҲМОНОВ тайёрлади