Тошкентда ЖЧга тайёргарлик авжида, бугун WT раҳбари юртимизга келади

Айни кунларда Ўзбекистон таэквондо WT ассоциацияси бўлажак мусобақани юқори савияда ташкил этиш учун астойдил тайёргарлик кўрмоқда. Бизга маълум бўлишича, мазкур жаҳон чемпионатида дунёнинг беш қитъасидаги 70га яқин давлатдан қарийб 850 нафар ўғил-қиз ғолиблик учун баҳс олиб боришади.

Ўзбекистон кадетлар терма жамоаси жаҳон чемпионатида 20 нафар спортчи (10 нафар ўғил, 10 нафар қиз) билан иштирок этади. Спортчиларимизни ушбу мусобақага истеъдодли мураббийлар Собир Назаралиев ҳамда Жасур Бойқўзиевлар тайёрлашди.

Мусобақага 7 август куни соат 9:00дан старт берилади. Беллашувларни ўғил болалар ўртасида 65 килогача бўлган вазн тоифасидаги атлетлар бошлаб беради. Тантанали очилиш маросими эса шу куни соат 17:00га белгиланган. Жаҳон чемпионати баҳслари пойтахтимиздаги “Универсал” спорт саройида бўлиб ўтади.

Бугун чамаси кечки соат 20:00да юртимизга жаҳон таэквондо федерациясининг президенти, 9-дан қора белбоғ соҳиби, доктор Чунг Ван Чой ташриф буюради. Сафар давомида фахрий меҳмон Ўзбекистон Миллий университети қошида очилган Таэквондо факультетида бўлиб, бу ерда яратилган шарт-шароитлар билан танишади. 

Шунингдек, Университет раҳбарияти билан ҳам учрашув белгиланган. Қолаверса, мамлакатимиз спортининг мутасадди раҳбарлари ҳам жаноб Чойни қабул қилиши режалаштирилган.

Таэквондо WT бўйича кадетлар ўртасидаги жаҳон чемпионати баҳслари эса 10 август куни якунига етади.