Тошкентда Олимпиада учун лицензион мусобақа ўтказилади: Қиличбозларимиз турнирга қизғин ҳозирлик кўришмоқда

Қиличбозларимиз ҳозирда ушбу мусобақага қизғин ҳозирлик кўришмоқда.

Жумладан, сабля бўйича терма жамоамиз Венгриядаги Жаҳон кубогидан кейин Грузияда яна бир ўқув-машғулот йиғинини олиб бормоқда. Йиғин доирасида кеча ва бугун Грузия, Бразилия ва Ўзбекистон терма жамоаларида ўртоқлик турнири ташкил қилинди. Аҳамиятлиси, унда яккалик беллашувларида Зайнаб Дайибекова барча рақибларини мағлубиятга учратиб, биринчи ўринни қўлга киритди. Жамоавий беллашувда ҳам қизларимиз рақибаларидан устун эканликларини амалда исботлашди.

Шпагачиларимиз эса Қозон шаҳрида ташкил этилаётган Жаҳон кубогида иштирок этишди. Дунёнинг энг кучли қиличбозлари қатнашаётган мазкур турнирда ҳозирда кучли 32 лик шаклланиб улгурди. Афсуски, вакилларимиз ушбу босқичга чиқа олишмади ва энди бор эътиборларини Тошкентда ўтажак йиғинга қаратишади.

Рапирачиларимиз эса Беларусь йиғинидан сўнг Истанбулда бўлиб туришибди. Асосан ёшлардан иборат жамоамиз келаси ой бўлиб ўтадиган жаҳон чемпионатига ҳозирлик кўрмоқда.