Тошкентда Осиё от спорти федерациясининг Бош Ассамблеяси ўтказилмоқда

Ушбу йиғилишда қитъамизнинг 16 мамлакатидан вакиллар иштирок этишмоқда. Шунингдек, Осиё от спорти федерацияси президенти, Қатар қироллик оиласи аъзоси Шайх Ҳамад Ал-Аттия ҳам юртимизга ташриф буюрган.

Йиғилиш давомида Осиё от спорти федерацияси низомига ўзгартириш киритиш ҳамда Ўзбекистонда конкур бўйича ўсмирлар ўртасидаги IV Осиё чемпионатини ўтказиш, шунингдек бошқа бир қатор масалалар муҳокама қилинади.

Шуни алоҳида қайд этиш лозимки, 20 йиллик танаффусдан сўнг низомга ўзгартириш киритиш ташкилот учун тарихий воқеа ҳисобланади. 12 декабрь куни эса Осиё от спорти федерацияси президенти Ҳамад Ал Аттия йиғилиш якунлари бўйича чиқиш қилиши кутилмоқда.