Тошкентда спорт тиббиёти муаммо ва истиқболларига бағишланган конференция ўтказилади

Миллий Олимпия қўмитаси билан ҳамкорликда ўтказилаётган анжуманда нафақат мамлакатимизда шу соҳада фаолият юритаётган шифокорлар, балки Туркия, Россия ҳамда МДҲ давлатлари спорт тиббиёти мутахассислари ҳам иштирок этади. 

Таъкидлаш керакки, давлатимиз раҳбари томонидан юртимизда жисмоний тарбия ва спортни ривожлантириш, у орқали спортчиларимизнинг Осиё ва жаҳон миқёсидаги мусобақаларда муваффақиятли иштирок этишни таъминлаш, жумладан, спорт тиббиётининг илғор ютуқларини ўрганиб, амалиётга татбиқ этиш борасида кенг кўламли ишлар амалга оширилмоқда. 

Анжуманни ўтказишдан кўзланган асосий мақсад - спорт тиббиётидаги ютуқ ва муаммолар, мусобақалар жараёнида спортчиларнинг жароҳат олмаслигини таъминлашда тиббиёт ходимлари ролини ошириш, бўғимлар шикастланишини олдини олиш, даволаш ва тиббий тиклаш муаммолари, спорт тиббиётида реалибитация ва физиотерапиянинг ўрни каби мавзуларга эътибор қаратилади. 

Конференция ишида мавзулар юзасидан етакчи спорт тиббиёти шифокорлари ўз маърузалари билан чиқиш қилади. Конференциянинг биринчи куни, яъни 8 ноябрь Тошкенда ўтказилса, конференциянинг қолган қисми 9 ноябрда Самарқанд шаҳрида давом этади. 

Илк бор ўтказилаётган ушбу конференция мамлакатимизда спорт тиббиётини янада ривожлантиришга хизмат қилади.