Тошкентда Хавьер Мендес иштирокида яна бир тадбир ўтказилди, у бу сафар ҳам Хабиб мавзусига тўхталди ФОТОРЕПОРТАЖ

Мендес беш нафар UFC чемпионини тайёрлаган дунёдаги ягона мураббий ҳисобланади. Шогирдлари орасида фаолиятини мағлубият нималигини билмай якунлаган Хабаб Нурмагомедовни алоҳида таъкидлаш жоиз. Доғистонлик чемпионнинг оламшумул натижаларида Мендеснинг меҳнати беқиёс. 

Бугун исм-шарифи катта харфлар билан ёзиладиган мураббий Ўзбекистон дзюдо федерациясида меҳмон бўлди. Меҳмонни Ўзбекистон Миллий олимпия қўмитаси вице-президенти, дзюдо федерацияси раиси Азизжон Камилов, терма жамоа бош мураббийи Илиас Илиадис кутиб олди. Мендес Илиасни яқиндан танишини, унинг бошчилигидаги Ўзбекистон терма жамоаси Токио Олимпиадасида муносиб иштирок этишига ишонишини урғулади.    

"Натижага эришиш осон эмас. Айниқса, тўрт йилликнинг энг нуфузли мусобақаси ҳисобланган Олимпиадада. Бу тоғнинг энг юқори чўққисига чиқиш билан баробар. Сизлар ҳозир шу машаққатли йўлнинг ярмидан кўпини босиб ўтдинглар. Ҳаммаси ўзингизга боғлиқ. Иштиёқ билан ҳаракат қилсангиз, кўзланган маррага етиб борасиз. Акс ҳолда шунча ҳаракат бесамар кетади. Сизларга Хабибнинг охирги жангини мисол қилиб келтираман. У Жастин Гэтжига қарши жангга уч ҳафта қолганида оёғини синдириб олганди. Биз унга жангни қолдириш таклифини бердик. Хабиб эса буни кескин рад этди. Фаолиятидаги энг муҳим жангга тайёргарлик жараёнида оёғи сингани билан руҳи синиб қолмаганини айтди. Руҳий тайёргарлик ғалабанинг асосий омили бўлиб, уни ҳар бир спортчи ўзида шакллантириши керак. Хабибдан нима кам жойинглар бор? Шу саволни ҳар бирингиз ўзингизга албатта беринг. Сиз ўзгаришингиз керак. Шунда натижа ҳам бўлади. Фурсатдан фойдаланиб, сизларга олдинда турган муҳим мусобақаларда ғалаба ва омад ёр бўлишини тилайман", - деди Мендес. 

Шундан сўнг Хавьер Мендес ўзи учун совға қилинган киманода маҳорат сабоқларини намойиш этди. Дзюдочилар машғулот сўнггида таниқли мураббий билан суратга тушишди. Федерация томонидан меҳмонга эсдалик cовғалари топширилди.