Тойлоқда белбоғли кураш бўйича Ўзбекистон чемпионати ўтказилмоқда

Ўзбекистон Республикаси  Спортни ривожлантириш вазирлиги ҳамда Ўзбекистон белбоғли кураш федерациясининг йиллик тақвим режасидаги жорий йилнинг илк мамлакат чемпионати баҳсларида Қорақалпоғистон Республикаси, Тошкент шаҳри ва барча вилоятлардан 300 нафарга яқин ёш полвонлар ғолиблик учун кураш тушишмоқда. Мазкур чемпионат баҳсларида дастлаб, мусобақанинг тантанали очилиш маросими ташкил этилди. Маросимда Самарқанд вилояти спортни ривожлантириш бош бошқармаси масъул ходимлари, Ўзбекистон белбоғли кураш федерацияси раиси Равшан Дастиров, Осиё белбоғли кураш конфедерацияси раиси Мўминхўжа Муратов, федерация бош котиби Абдихалил Маликов,  белбоғли кураш бўйича Самарқанд вилояти ижрочи директори Баҳодир Бердиқулов, Тойлоқ олимпия ва паралимпия захиралари коллежи директори Ўткир Қурбоновлар иштирок этиб, ёш полвонларни қутлашди ва уларга мусобақаларда омад тилашди.   

Ушбу чемпионатда ўғил болалар белбоғли курашнинг эркин ва классик йўналишларида 11 та вазн тоифасида, қизлар эса эркин йўналишда 7 та вазн тоифасида ғолиблик учун кураш тушишмоқда.

Беллашувлар якунига етгач, кучли учликдан жой олган полвонлар билан танишишингиз мумкин. Мусобақа 20 мартга қадар давом этади.    

Илҳом РАҲМОНОВ тайёрлади