Тунислик теннисчи Берлинни забт этди

Ҳал қилувчи финал учрашувида дунёнинг тўртинчи рақамли теннис маликаси бўлиб турган Онс Жабер WTA рейтингининг 17-поғонасидан жой олган швейцариялик Белинда Бенчичга қарши кортга чиқди. Биринчи сет 6/3 ҳисобида Онс фойдасига ҳал бўлди. Иккинчи сетнинг учинчи геймидан сўнг Белинда баҳсни давом эттира олмаслигини маълум қилди. Бу пайтда ҳисоб 2/1, Жабер фойдасига бўлиб турганди.

Шу тариқа, 54 дақиқа давом этган ва якунига етмай қолган финал учрашувида 27 ёшли Онс Жабер бош совринни қўлга киритди. У 6 та эйс, 3 та брейкни амалга ошириб, умуман қўшхатога йўл қўймади. 25 ёшли Белинда эса ўз ҳисобига 1 тадан эйс ва брейк ҳамда учта қўшхато ёзиб қўйди. 

Бугун эълон қилинган янги рейтингда Онс Жабер учинчи ўринга кўтарилиб олди. Бу унинг фаолиятидаги энг яхши кўрсаткич ҳисобланади. Жабер фаолиятидаги учинчи совринини қўлга киритди. Берлиндаги муваффақиятли иштирокидан у €93,823 пул мукофоти ва 470 рейтинг очкоси ишлаб олди.