U-16 Бутунжаҳон Ўсмирлар Олимпиадасида асосий рақиблардан бири мағлуб этилди

Нуфузли мусобақада дунёнинг 45 давлатидан 90 та жамоа бош соврин учун баҳс олиб бормоқда. Ўзбекистон терма жамоаси ўртача рейтинг бўйича 2-ўринда қайд этилган. Халқаро гроссмейстер Сайдали Юлдашев бош мураббийлигидаги Ўзбекистон терма жамоаси таркибида халқаро спорт усталари Ҳумоюн Бегмуратов (2435), Муҳаммадзоҳид Суяров (2356), FIDE спорт устаси Асроржон Омонов ва аёллар халқаро спорт устаси, ёшлар ўртасида икки карра жаҳон чемпиони Афруза Ҳамдамова дона сурмоқда. 

Кеча Олимпиаданинг 6-турида ўсмирларимиз асосий рақиблардан бири ҳисобланган FIDE 2 жамоасини 3,5:0,5 ҳисобида мағлуб этишди. Турнирнинг марказий учрашувида FIDE 1 жамоаси Ҳиндистон терма жамоасидан 2,5:1,5 ҳисобида устун келди ва пешқадамлигини мустаҳкамлаб олди. 

Ўзбекистон терма жамоаси Олимпиаданинг 6-туридан сўнг 5 ғалаба ва 1 мағлубият билан 10 очко жамғарган ҳолда қўшимча кўрсаткичларга кўра 3-ўринга кўтарилиб олди. FIDE 1 жамоаси ҳисобида 12, иккинчи ўринда бораётган ва бизга енгилган Қозоғистон 2 жамоасида 10 очко бор. Қозоғистон 1, Ҳиндистон, Хитой терма жамоалари ҳам 10 очкодан жамғаришган.  

Бугун 7-турда Ўзбекистон терма жамоаси Ҳиндистоннинг асосий таркибига қарши баҳс олиб боради. Биринчи доскада FIDE 1 ва Қозоғистон 1 терма жамоалари ўзаро муносабатларига ойдинлик киритиб олади.