U-23 Жаҳон чемпионати. Алишер Ғаниев ярим финалда, қолганларда эса мағлубият

Мусобақанинг илк кунида юнон-рум кураши беллашувлари ўтказилмоқда.

Кун давомида уч нафар ҳамюртимиз гиламга чиқди.

Дастлаб, 72 кг вазнли Аброр Атабаев Пуэрто-Рико вакили Брэндон Наваррони 8:0, озарбайжонлик Руслан Нуруллаевни 3:2 ҳисобида таслим этди. Чорак финал босқичида эса ҳамюртимиз швециялик Жеоржис Барбаносга имкониятни бой бериб қўйди — 2:3.

Самандар Бобоназаров (82 кг) эса саралаш босқичида Венгрия терма жамоаси аъзоси Миклос Киральхазини 8:0 ҳисобида доғда қолдирди. Афсуски, ҳамюртимиз нимчорак финал босқичида Германия шарафини ҳимоя қилувчи Дени Накаевга 4:1 ҳисобида мағлуб бўлди.

Қувонарлиси, 60 кг вазн тоифасида терма жамоамиз аъзоси Алишер Ғаниев дастлаб, германиялик Георгиос Скарпеллони 9:0, кейинроқ руминиялик Денис Михаини 8:0, чорак финал босқичқида эса Украина вакили Богдан Хришинни 11:2 ҳисобида таслим этди.

Эндиликда ҳамюртимиз ярим финал доирасида озарбайжонлик Ниҳад Гулухадега қарши гиламга чиқади. Баҳс 21:00 да бошланади.