Учта медалга эга Ўзбекистон Tbilisi Grand Slam турнирини нечанчи ўринда якунлади?

Уч кун давомида дунёнинг 5 қитъаси 52 давлатидан жами 385 нафар (219 эркак, 166 аёл) дзюдочи медаллар ҳамда жаҳон рейтинги учун бериладиган қимматли очколар учун баҳс олиб боришди. 

Мусобақанинг сўнгги куни ўтган йилги Ўзбекистон чемпионатининг бронза медали совриндори Умар Бозоров (-90 кг) фаолиятидаги илк халқаро мусобақасидаёқ шоҳсупанинг энг юқори поғонасига кўтарилди. 

У IJF байроғи остида иштирок этган Явор Варапеу, грузиялик Сосо Эбилашвили, венгриялик Петер Сафрани, нидерландиялик Марк Ван Дийкни мағлубиятга учратди. Олтин медаль учун кечган муросасиз беллашувда жаҳон рейтингида 24-ўринни эгаллаб турган фарнциялик Алексис Матёни чиройли усулда таслим этди. Бозоров олтин медаль билан бирга 1000 рейтинг очкосини ҳам ўз ҳисобига қўшиб қўйди. Дзюдочиларимиздан Азизбек Ортиқов ва Абдураҳим Нутфуллоев -66 кг вазн тоифасида бронза медалларини қўлга киритишди. 

Шу тариқа, Ўзбекистон терма жамоаси 1 та олтин, 2 та бронза медали билан Tbilisi Grand Slam 2025 турнирини умумжамоа ҳисобида 4-ўринда якунлади. Франция терма жамоаси 3 та олтин, 3 та кумуш, 4 та бронза медали билан 1-ўринни банд этди. Мезбонлар 2 та олтин, 2 та кумуш, 5 та бронза медали билан иккинчи бўлишди.