УЕФА Исроилни четлатмайди. Бу масала кун тартибидан олиб ташланди

УЕФА Исроилни халқаро мусобақалардан четлатиши борасидаги масала кун тартибидан олиб ташланди. Бу ҳақда Israel Hayom хабар бермоқда. Аввалроқ хабар қилинганидек, Исроилни четлаштириш масаласи 23 сентябрь куни УЕФА ижроия қўмитаси томонидан овозга қўйилиши мўлжалланган эди.

Газетанинг ёзишича, бу масала ҳозирда кун тартибидан олиб ташланган. Исроил футбол ассоциациясига ушбу ишни ҳал қилишга исмлари ошкор этилмаган дипломатлар, бошқа федерация раҳбарлари ва футбол амалдорлари ёрдам кўрсатган.

Таъкидланишича, бу жараёнда АҚШ расмийлари ҳам бевосита иштирок этиб, УЕФА раҳбарларидан "мавжуд вазиятни ўзгартирмасликни" қатъий талаб қилган.